قهوة مضروبة!

 الحمدلله اللي بلّغنا هالشهر الفضيل، والله يتقبل منا ومنكم الصيام والقيام وكافة العبادات..

اللهم آمين..

***

أحس يوم أني فتحت المدونة اليوم قالت من أنت؟ وش تبي؟

للأسف الجديد أني ساحب على والديها، وللأسف الأشدّ أني كنت مشغول بتاتاً البتة..

أعرف قريحتي المخيسة ما تحكني إلا وقت الاختبارات، ف أنا يا محاتسيكم عندي اختبار باتسر إن شاء الله ولا فتحت شي..

أزيدكم من الشعر بيت، ما تجيكم هذيك الحالة اللي مالك خلق تفتح شي ولا تسوي شي ولا تقرا شي لدرجة أنك لو تبي ترقد ما رقدت ولو تبي تقوم ما قمت ولو تبي تسوي أي شي ماتقدر تسوي اي شي!!

يارب وصلكم الشعور ألحين؟

***

اليوم هو يوم السبت الموافق ثلاثة من شهر رمضان الكريم، يووه يا سرع الأيام والله باقي ٢٧ يوم عالعيد إن شاء الله

المهم، بقولكم سالفة، اليوم اتصلت على أربعتن من ربعي العزوبية الملحطين بنجتمع ونفطر سويّة، وكل واحد يجيب معه طبق وبدون كلافة..

اجتمعنا قبل أذان المغرب بنص ساعة، فتحنا الحافظات، كلها شوربة يالله لك الحمد والشكر..

كان الفطور لذيذ جداً ومشبع والحمدلله لدرجة أننا اتصلنا على ماكدونالدز وطلبنا عشاء..

***

دامك وصلت لهالسطر ف واضح أنك فاضي، ويمكن فاهي، وأحياناً فاهية إذا كنتي أنتي أنتي، قصدي إذا اللي يقرا السطور رجل أو شاب سواءاً ذكر أو أنثى #القذافي

الشاهد في كلامي، أن المخدرات شي مضر بالصحة للأسف، نعم للأسف..

فلو لم تكن مضرة بالصحة لما ارتفع سعرها كذا <<لا لا مالها دخل يبوي..

***

الزبدة، أوصيكم بتقوى الله، والصلاة والعبادة، وبقولكم وش اللي طق تسبدي اليوم صدز..

اثنين من الإخوة الزملاء كانوا يتناقشون أمامي نقاش حامي حول جواز أو تحريم سماع الأغاني، وكلن يستدل بأحد العلماء،

بعد نهاية النقاش، اللي كان يقول الأغاني حرام، شغل مقطع عبدالحليم حافظ، والشخص الآخر، طق له زقارة مالبورو وجالس يتنهدّ عشان مرقّم وحدة في تويتر وطلعت شنب..

***

مايستفاد من الموضوع:

واضح أن القهوة اللي جالس اتعاطاها الآن مضروبة..

وصلى الله وبارك على سيدنا ونبينا وحبيبنا محمد وعلى آله وصحبه أجمعين..

 

 

يمكنك ترك تعليق, أو التعقيب من خلال موقعك.